政情：林D9暗寸鬍鬚曾「單聲道」
傳聞財政司司長曾俊華喺下屆政府有得留低，政務司司長林瑞麟就決定去讀神學。尋日遠在四川嘅林D9表示自己精通普通話同廣東話，話佢唔係暗寸鬍鬚曾係「單聲道」都無人信。
鬍鬚曾嘅普通話水平極為一般，早前去台灣訪問全程用廣東話發言「遮醜」，玩殘當地記者不在話下，到最近有國家商務部官員來港時，鬍鬚曾又懶醒為咗討好部委官員講普通話，但聽過嘅人幾乎冇人完全明佢講乜。
相反林D9尋日喺四川會見傳媒時，主動詢問大家希望佢哋用普通話定廣東話發言，當記者齊聲答「普通話」後，林D9突然自問自答，提出如果佢答普通話，咁香港嚟嘅記者點辦，然後自言自語，話講完普通話，如有香港媒體需要佢講廣東話都可以喎，仲唔係寸爆鬍鬚曾？
林D9今次去四川成都，係出席香港支援四川地震災後重建集體項目竣工，除咗答記者問題，佢都有用普通話致詞，證明呢位快將喺香港人視線暫時消失嘅人肉錄音機，播普通話都一樣得。