政情：楊受成捐500萬 支持奧比斯
為致力救盲而翱翔天際三十載嘅奧比斯眼科飛機醫院，由於機體漸呈老化，極需更新換代。英皇集團主席楊受成尋日就捐出港幣五百萬元，為新飛機醫院內嘅器材設備出一分力，期望能起帶頭作用，推動社會各界慷慨解囊，令新一代嘅飛機醫院可於明年投入服務，幫助更多人復見光明。
楊受成話，大概四至五年前，佢眼中嘅世界總係帶有一絲淡黃，但經過白內障手術後，久違嘅雪白明亮先至重現眼前，面對因眼疾而陷入黑暗嘅人，可算感同身受。楊受成又話，過去佢曾資助一個內地兒童嘅救盲行動，事後收到受助人嘅答謝信，令佢非常窩心之餘，又覺得助人脫離黑暗好有意義。
楊受成今次捐出嘅五百萬元，佔咗英皇集團慶祝七十周年慈善專項中嘅一半款項。楊受成以擁有私人飛機嘅經驗指出，一架飛機嘅開銷頗為巨大，所以今次捐款未夠更新飛機醫院嘅開銷，但希望自己嘅舉動可以拋磚引玉，令到更多人捐款畀奧比斯喎。