中環出更：陳文綺慧鬆一鬆 東華夜宴盡情玩
東華三院主席唔易做，陳文綺慧（Viola）上任個多月，頻頻探訪唔同部門，每日由朝做到晚，直到早幾日終於抖一抖，按照東華傳統宴請董事局成員及歷屆主席，新舊東華人雲集，前主席周振基、馬清鏗、廖烈武、王忠桐、梁定宇等紛亮相，剝完牙嘅總理李鋈麟，都拉埋主診牙醫兼前東華總理梁家駒撐場，教育局局長孫明揚夫婦都到場湊熱鬧。
晚宴喺黃竹坑如心南灣海景酒店舉行，難得輕鬆吓，Viola滿場飛敬酒，轉頭被女童軍香港總監兼表嫂彭徐美雲拉上台，合唱《Top of The World》及《Sway》，彭太載歌載舞，賓客都被佢掀動，聞歌起舞。Viola嘅「靈芝大王」老公陳宇齡都係歌王，遺傳歌星家姐陳美齡嘅優良基因，獻唱《相思風雨中》，聲線洪亮，睇怕拍住家姐登台，應該無難度。
方文雄「坐艇」未驚過
中華總商會副會長方文雄（David）就孖住留學南加州大學嘅二仔Vincent到賀。Vincent似足爸爸，精於投資，近日趁暑假加入渣打銀行衍生工具部門學嘢，認真勤力。港股近日跌到四腳朝天，David都直認有損手，但手持股票係穩健藍籌，「坐艇」都唔驚喎。恒指跌到幾時可以撈底？David就話手中無水晶球，唔識睇，但派息唔錯嘅籃籌，會分段撈底，一句講晒，對港股有信心咁話！
卓妮