政情：副局薪高 政商爭崩頭

夕陽政府最近決定將下屆政府嘅副局長薪酬劃一加至每月廿二萬五千元，相等於問責局長薪酬嘅七成，消息傳出後即時令部分政商界人士心郁郁，當中政圈盛傳至今最少有三人會應徵做副局長。

黃以謙不置可否

據聞任職精神科專科醫生嘅黃以謙，有意應徵做食物及衞生局副局長。其實佢○八年曾表態有興趣做副局長，但礙於當時佢所屬嘅自由黨領導層似乎無乜反應，最後連面試機會都無。黃以謙接受查詢時，無斷然否認傳聞，強調自己一向有意服務港人，又話如果真係有機會參與政策制訂，佢都會研究吓喎。不過，由於佢身兼九龍城區議員，如果真係入閣就要舉行補選喇！

鄺志堅利弊參半

政圈盛傳嘅另一個應徵者名字係工聯會大狀鄺志堅，有意應徵做勞工及福利局副局長。鄺志堅接受查詢時強調，至今未有人搵佢見工，亦無梁營嘅人搵過佢，但佢承認有同其他人討論過呢個話題，但唔評論當中詳情喎。有心水清嘅政壇中人分析，鄺志堅入閣利弊參半，好處係工聯會終於有人加入制訂政策嘅行列，弊者係好大機會同極可能循超級區議會議席強勢回歸立法會嘅陳婉嫻打對台。

張文韜攞安慰獎

此外，有傳民建聯張文韜獲黨推薦更上層樓，由政治助理「升呢」做副局長，但由於新政府取消咗發展局，所以仲未知佢會轉投邊個政策局。該黨中人估計，呢個安排係對張文韜嘅「安慰獎」，因為原本該黨有意安排佢接替李慧琼循九龍西直選進身立法會，但喺該黨多個支部強烈反彈下，終令計劃胎死腹中。我哋曾經打畀張文韜求證有關傳聞，但最後未獲回覆。