立法會主席有權唔畀議員提出一啲「瑣屑無聊」嘅修訂，不過立法會主席曾鈺成就話，唔覺人民力量就立法會出缺安排嘅條例草案提出千三項修訂無聊，呢條條例係講緊應否剝削一個人嘅參選權，事關重大，絕對唔可以隨口一句毫無意義、瑣屑無聊，就唔畀議員討論咁話。有份提出千三條修訂嘅人民力量議員陳偉業尋日就喺網上留言，話曾鈺成多年來係佢一個值得尊重嘅對手。曾鈺成幾時做咗陳偉業嘅戰友？ 正當建制派議員一邊密密籌劃應對輪更表，一邊喺度鬧人力嘅修訂無聊之際，曾鈺成未有幫拖之餘，仲暗寸輪更制。其實呢位民建聯前主席同建制派「分開走」都唔係第一次，嚟緊九月立法會選舉，佢就寧願選擇獨戰港島，都唔想民建聯嘅人加入佢嘅名單，理由係佢嘅參選政綱係角逐立法會主席，唔啱排喺佢隊尾嘅人喎。