政情：鄧國斌鐵定退休歎世界

鄧國斌喺九十年代初開始喺廉署任職，九八年轉任印務局局長。對於傳聞話佢會返廉署擔任回歸以來第七位廉政專員，佢語帶肯定話無聽過呢個傳聞，又話六月底退休後唔會再擔任任何公職。鄧國斌話，依家目標係要完成任期內所有工作，又大呻要寫報告搞到佢無時間計劃退休生活。

早前煲呔曾豪花納稅人血汗錢玩盡南美，畀人踢爆後仲裝模作樣，搵審計署覆檢特首嘅外訪做法，研究住宿安排有無可改善空間，認真無恥。鄧國斌就話，審計署人員現正密鑼緊鼓搜集資料，暫時仲未得閒開會討論，但一定會趕喺五月底前向特首提交報告喎。