中環出更：鄺英志＋尹師讌 星級酒菜擦火花
美酒與佳餚嘅完美配襯，係人類味蕾最美妙嘅追求。全球排名最高嘅華人品酒師鄺英志（Peter），經常幫襯城中著名私房菜館「尹師讌」嘅精緻粵菜，最近心血來潮同菜館老闆兼名廚尹達剛合作，以美國加州葡萄酒配菜。兩位星級人物首次雙劍合璧，吸引力爆燈，雖然五月十八日先至有得食，但城中饕客已急不及待訂位一試為快。
今次星級特色菜單名為《曲水流觴》名仕讌，重溫唐朝名人雅士飲酒吟詩嘅雅興。尹達剛係第一批廣東廚師去日本掌廚，旅居日本長達三十幾年，對中國嘅飲食文化頗有研究。多年前返港後開設私房菜館，融入懷舊粵菜及日本懷石料理嘅精髓，「雙懷菜」盛名遂不脛而走。
加州葡萄酒 餘韻留香
今次Peter以七款加州葡萄酒，配襯尹大師以極品烏魚子、北海道鱈場蟹等上乘食材炮製嘅佳餚，配酒由一百五十元至一千二百元不等，每席盛惠八千八百八十元。Peter話，加州酒於七六年嘅「巴黎審判」葡萄酒大賽中，擊敗法國對手之後一鳴驚人，特色係內斂優雅及奔放果香兼備，餘韻留香。
滿枱美酒佳餚，Peter最欣賞醬爆牛肉粒配襯○八年份嘅Petite Sirah紅酒，形容為酒席嘅高潮，果性澎湃嘅靚酒配襯濃郁嘅中式醬料，簡直係天作之合。
卓妮