政情：邱榮光同自由黨分手
近年元氣大傷嘅自由黨，最近又有多一位資深黨員退黨，佢就係大埔區議會委任議員邱榮光。邱博士尋日同我哋證實，已經無交會費半年，原因係唔想同自由黨再有合作關係，話要尋求另一段關係喎。
呻從無擔當重任
尋日我哋上大埔區區議會網頁，見到邱榮光嘅政治聯繫已經唔見「自由黨」三粒字，而佢亦向我哋證實，自己半年前已經無再交自由黨會費，諗住咁就當係自動退黨。佢解釋，黨費錢銀事小，最大問題覺得喺黨內無得發揮，因為自己喺自由黨咁多年，都無擔當乜嘢重任，係時候換一換地方，然後再上路。
邱榮光係大埔區委任議員多年，專長環保保育事項，業界內都有一定知名度。不過邱博士就話，○八年當時嘅黨主席田北俊喺新界東參加直選時，都無搵佢幫手，相信今次就算田少出選，佢退唔退黨都無咩大關係。至於佢係咪會過檔新界鄉議局主席劉皇發都係成員嘅經濟動力？佢即刻笑笑口話「諗諗啦」，似乎一切盡在不言中。