政情：流會帶挈 議員各自精彩
立法會議員經過前日「拉布」式會議疲勞轟炸後，尋日因為開會人數不足而流會，令一班本來諗住死守立法會嘅議員，突然間變多咗好多時間出嚟，各自各精彩。有人趁機去睇牙醫，有人去做手術，更有人話即刻返黨開會，搞到自己好似一開會就無晒時間做私務咁。
今次成功拉布嘅人民力量黃毓民話，早前已預約咗眼科醫生今日做白內障加眼角膜手術，但因為諗住要留守立法會拉布，被迫將手術押後，點知尋日咁快就搞到流會，所以即時約番醫生今日做手術，估計休息兩日後，下星期三可以再戰立法會。
葉劉趁機驗牙
新民黨主席葉劉淑儀就話，有隻牙隱隱作痛，既然得閒，中午會去牙醫度檢查吓，夜晚仲會去埋解放軍酒會，一連兩場都唔使趕頭趕命返立法會，輕鬆好多。至於工聯會嘅黃國健，原本諗住帶定普洱濃茶去開會頂眼瞓，點知依家得物無所用，話好失望喎。