政情:阿Paul拒泊新民黨碼頭

新民黨主席葉劉淑儀近期動作多多,繼早前成功拉攏葵青區議會「票后」張慧晶入黨成為「樁腳」後,政圈盛傳葉太最新目標係「法律超人」謝偉俊(Paul),意圖將該黨勢力擴展至九龍東,染指更多立法會議席增強該黨實力。不過,據聞阿Paul向葉太明示或暗示對過檔無興趣,慘食檸檬嘅葉太疑似「反客為主」,揚言已經對阿Paul失咗興趣,呢段政治婚姻正式宣告無疾而終。

泛民主派及建制陣營多年來都喺九龍東平分秋色,今屆九龍東由四席增至五席,形象相對獨立嘅旅遊界議員阿Paul成為西環嘅力捧對象,望佢由功能界別轉戰九龍東,預料好大機會以最後一席成功入立法會。據聞葉太對於阿Paul突然政治能量大增刮目相看,早前就搵阿Paul食飯「摸底」,事後雙方嘅良性互動消失得無影無蹤,明眼人一睇就知阿Paul請葉太食檸檬。

葉劉吃不到的便是酸?

我哋就此問過阿Paul,佢事後意有所指話,本身已有另一半「白姐姐」白韻琹喺屋企「指指點點」,暗示自己係怕女人所以入黨免問。葉太接受查詢時,無否認曾經搵過阿Paul入黨,又話查實佢只係同阿Paul食過一餐飯,事後都無跟進,依家對阿Paul已經失去興趣喎,葉太嘅態度突然大轉變認真耐人尋味,究竟佢哋之間發生乜嘢事呢?

其實又不難理解嘅,事關阿Paul話明參選係主打獨立及專業人士,自然唔想有政黨綁身,加上佢自嘲「吊兒郎當」,同埋係自由主義派,做嘢都可以自由啲同放啲。其實阿Paul嘅政治野心都好大,除咗自己落場直選外,疑似為白姐姐參選超級區議會「試水溫」。佢話,白姐姐有知名度,即使要攞參選提名亦唔會太難,如果成事,佢哋將會係夫婦檔參選立法會。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報