中環出更：CY回味雙餸快餐
候任特首梁振英（CY）日日忙住籌組新政府工作，好多未當選前嘅生活習慣都改變咗，例如晏晝開飯。尋日中午，CY就趁去新政府總部開會，回程時特登去佢以前經常幫襯嘅怡和大廈地庫間快餐店，見佢唔使五分鐘就拎住飯盒出嚟，然後坐上座駕返候任辦公室慢慢歎。
之後CY喺網誌上話，佢買咗章魚肉餅及沙葛肉片雙餸飯盒，連埋碗中湯，盛惠五十一元。以前佢經常光顧呢間快餐店，事關佢以前嘅辦公室就喺嗰度，今次係佢當選後第一次返去幫襯，相信呢餐飯一定食得好滋味。
紀文鳳現身候任辦
CY又話，候任辦設喺中區政府合署，由於大部分政府部門已搬到新政府總部，連食堂都撤走埋，所以佢過去一個月中午好少約朋友食飯，通常會返屋企食，或者返工時帶盒沙律當午飯，難怪佢身形keep得咁fit。
卓妮尋日仲見到前梁營競選辦副主任紀文鳳現身候任辦，卓妮問佢係咪嚟搵CY，佢就笑笑口話：「嚟參觀吓啫！」
卓妮