貪腐醜聞糾結一身的曾爵士，在巴西過吓總統癮，入住五萬四千港元一晚的豪華總統套房，其貪威識食的嘴臉，再一次暴露港人面前！禮賓府外杜鵑開，維港水污跛鴨知，香港「廉潔奉公」嘅招牌給貪曾一下子潑污蒙黑！
貪曾臨收工，寡廉鮮恥傾情演出貪到最後一分一秒，臨下台不惜頻頻出訪，狂花公帑，去年外訪九次，離港三十九天，卸任前已踏遍五大洲，認真逍遙，快活過神仙。至於佢外訪頻仍嘅成效以及是否必要，相信盲嘅都睇到，根本經不起推敲！貪曾在餘下兩個月左右時間，本應努力幫助候任特首CY做好交接工作，如今以待罪之身一味往外跑，自己住豪華總統套房，又話為香港找商機，咁嘅古仔，信佢都腦殘啦！
貪曾做咗一世公務員，位極人臣，照道理應該明白管子所說的「倉廩實，則知禮節；衣食足，則知榮辱」，可惜佢衣食足仍不知榮辱，何以故？老朽只能說貪曾嘅人生目標只係停留在追求權和錢的階段，一息尚存，依舊兩手要抓住權和錢！在貪曾的字典裏，只有「貪得快，好世界」六個字。
一個基因只有「貪」的人，只追求門面的豪奢堂皇，身穿華衣麗服、手戴名錶、住豪宅駕靚車，最多引來艷羨目光，而要贏得他人敬重，是人格的尊嚴！貪曾不明這個道理，按「程序」貪了，就不覺可恥？做特首做到佢咁款，總算為人類史添多一個「貪到死永不言悔」嘅變種！