政情：維園工展擬迫遷啟德
維園舉行嘅工展會，早已成為市民嘅集體回憶，一家大細拖篋趁墟掃平貨，對普羅家庭幫補唔少。不過，繼去年康文署擬大幅加租，想將工展會迫遷去山長水遠嘅機場博覽館後，今年康文署又再出招，打算將工展會迫遷到舊啟德機場空地舉行，結果又惹來風波。
據聞康文署嘅迫遷理由，係回應有區議員轉介市民投訴，長達廿幾日嘅工展會減少區內市民嘅活動空間。無端端接咗個燙手山芋嘅東區區議會，日前就通過支持工展會繼續喺維園舉行，即刻將個波踢番畀康文署。工展會始終係以方便市民掃貨為主，如果搬去沙塵滾滾、交通不便嘅地方，就認真擾民喇！
話時話，如果康文署堅持迫遷工展會，分分鐘陷候任特首梁振英（CY）於不義，事關工展會係由中華廠商聯合會旗下公司主辦，眾所周知，廠商會十幾名選委都係唐英年嘅支持者，若年底工展會真係告別維園，仲唔畀人大做文章話CY秋後算帳咩？所以康文署應該自行搞番掂個爛攤子。