中環出更：老夫子50歲生日 潮着Prada皮褸
家喻戶曉嘅漫畫老夫子，明年五十歲生日，作者王澤童心未泯，近日為老夫子脫下長衫馬褂，改穿Prada皮褸、Dior花褲、Gucci花恤衫、仲有LV令立立皮鞋。老夫子都崇尚名牌，究竟係王澤世俗了，還是要迎合九十後嘅口味？王澤堅定話：「老夫子毋須為迎合讀者口味而改變，變潮，係一個surprise（驚喜）！」
趙式和撐王澤開畫展
近年喺台灣定居嘅王澤日前旋風式訪港，頭髮花白了，但老夫子式嘅幽默、風趣語調，全程掛在嘴邊。自九七年後，王澤好耐都無在港開畫展，適逢老夫子五十歲牛一，於是決定大事慶祝，將在六月廿三日喺富豪趙世光千金趙式和（Jane）旗下畫廊「錦藝舫」（Galerie Huit）擺畫展。
今次新作多達五十幅，統統打破「四格」、「六格」漫畫嘅傳統，破格注入時尚元素。一個穿Gucci拉二胡、着D&G風騷行街嘅「新老夫子」，令人眼前一亮。作風大變，王澤話係無心插柳：「有次被台灣時尚名牌邀請，以老夫子漫畫來演繹佢哋嘅新裝，一試下大叫過癮。」但王澤強調，變潮，不是為了討年輕讀者歡心：「老夫子就係老夫子，可以活在過去，也可以活在將來。」
唯一不變嘅係，老夫子仍然多事、八卦，升斗小市民關注嘅話題，諸如通脹來了、化學食品、核輻射災難、盛男盛女，以至外星人等熱話，王澤都能巧妙融入漫畫中。當日佢興之所至，突然拿起畫簿，為同樣熱愛藝術嘅趙式和及名媛王馨平畫人像速寫，維肖維妙。
卓妮