成日都話飲水思源，功夫茶考考大家，香港人日日飲用嘅東江水，源頭係邊度？嗱，你唔好玩嘢答東江呀，呢一個唔係正確答案。不如咁問嘞，東江水嘅源頭係唔係位於廣東省？可能好多人以為係，不過係錯嘅，正確答案係江西省，更加精準嘅答案係江西省尋烏縣三標鄉東江源村。
之所以有必要同大家玩一玩問答遊戲，無他嘅，東江水源頭污染未解決，身為香港人嘅你應該知道問題所在。東方報業集團記者去到尋烏縣直擊報道，發覺當地河流沿岸堆積大量垃圾，乜鬼嘢塑膠袋呀，乜鬼嘢洗衣粉袋呀，乜鬼嘢化學肥料包裝袋呀，污糟邋遢見到都唔開胃。東江源村係就係有垃圾處理中心，亦有一個垃圾焚燒爐，之但係竟然無人操作，原因係乜呢？荒謬咯，原因係縣政府財力緊絀，冇錢請人開工，事關尋烏縣人均年收入少於二千三百元人民幣，水平低於國家貧窮線，屬於國家扶貧開發重點鄉鎮。
講到呢度，功夫茶有必要同大家澄清一件事，尋烏縣並唔係窮山惡水嘅鬼地方，反而係一處極具開發潛力嘅聚寶盆。首先，尋烏縣地下有稀土；其次，尋烏縣盛產桔同橙；如果又採礦又種橙，尋烏縣早就脫貧成功發過豬頭。關鍵就係，中國政府要保護東江水源頭免遭污染，所以勒令不准採礦亦不准種橙。換句說話嚟講，尋烏縣居民犧牲自己發展經濟嘅機會，成就下游區域同胞嘅飲水幸福。到頭來，縣政府窮到連請人處理垃圾都冇錢！
好嘞，既然香港年年花費三十幾億元向廣東省政府購買東江水，廣東省政府係咪應該補貼江西省政府，令到尋烏縣有錢做好保護水質工作呢？喂，人哋係因為確保下游地區有水飲，先至放棄發展有機會造成污染嘅經濟活動，你一毫子都唔回饋上游地區，講唔通啫！再講吖，回饋上游地區處理好垃圾問題，下游地區同樣受惠，唔好任得塑膠袋之類嘅不能分解物質破壞河流生態吖嘛！
所以話啫，香港水務署其實都有責任，應該向廣東省政府施壓。喂，畀咁多錢買東江水，梗係要防止污染㗎啦，點樣防止呀？要求廣東省政府出錢資助上游地區清除垃圾囉，冇理由甜頭就歸廣東，苦頭就歸江西。
呢嗱嗱嗱，港產官僚一定會好縮骨咁話，井水唔可以犯河水㗎，香港管唔到內地事務。計功夫茶話齋，呢家嘢唔係干涉內地事務，只不過係保障自己權益，如果水務署唔向廣東省政府施壓，受害嘅係香港同胞呀！
總而言之，東江源頭清垃圾，香港官僚也有責！