政情：陳冉畀「困身」考起
尋日喺候任特首梁振英（CY）答謝大會，人海之中企咗一個斯斯文文，但又略帶羞澀嘅女仔，佢就係候任特首辦項目主任陳冉（Ran）。Ran喺香港大學先後修讀傳理同金融，實習期間認識當時為CY工作嘅馮英倫（Allen），○八年畢業後經Allen介紹做CY助理，最近又雙雙跟CY入候任辦做政策研究至六月卅日。
來自內地嘅Ran話，自從幫CY做政策研究，對香港社會情況認識多咗，至於喺六月卅日去向如何，Ran同Allen答得好小心，總之所有嘢都要等老細CY話事喎！不過唔知佢哋嘅工作會唔會好困身呢？Ran就好似唔太明白乜係「困身」，笑言自己廣東話唔好。
至於Allen，佢除咗研究工作外，仲要搞埋網站工作，唔怪得前排有人戥佢得二萬幾蚊人工唔抵，但Allen就話無所謂啦！咁又係，後生仔能者多勞，總好過人工過高惹人非議吖！