中環出更：黃達東掌仁愛堂 領軍闖珠峰
每年四月係慈善機構換屆月，尋日輪到仁愛堂舉行就職典禮，由深水埗區議會副主席黃達東（Dennis）接任主席。Dennis啱啱上任，就宣布要帶大家由香港行去珠穆朗瑪峰喎！原來佢講緊嘅係一個智能手機遊戲，大家可透過遊戲記錄每日步行嘅時間，就可以模擬自己由香港遠征珠峰嘅情況。
堅守環保創新原則
Dennis話，呢個遊戲係配合宣傳仁愛堂嚟緊嘅學生環保考察團，屆時將有三十個來自香港、清華及北京大學嘅學生齊闖珠峰，佢大讚遊戲好好玩。上一屆董事局籌款近七千萬元，問Dennis有無信心再下一城？佢就話唔係淨係講錢嘅，仲要講心，最緊要堅守「環保」同「創新」兩大原則喎。
至於剛卸任主席嘅蔡黃玲玲，佢話卸任後要專注發展自己嘅慈善基金；而蔡太囡囡蔡珍妮（Elina）今屆亦退出總理，因為有太多年輕才俊想加入，所以佢讓位畀其他人喎。
卓妮