經濟動力同專業會議嘅立法會議員，尋日前後腳到候任特首辦會見候任特首梁振英（CY），之前出面挺唐嘅經濟動力林健鋒（Jeffrey）、梁君彥都有出席。Jeffrey上次打住條橙色呔，喺「大和解」飯局坐正係CY身邊，正當大家都覺得佢已經轉投梁營之際，Jeffery同梁君彥尋日就不約而同打咗條藍色領呔，莫非佢哋唔想聽外間啲閒言閒語？
正當Jeffrey笑笑口諗解釋佢條呔時，企喺身邊嘅梁劉柔芬（Sophie）就好有弦外之音咁搶答：「哎呀！揀咗（呢隻色）啫！」跟住就同Jeffrey轉身走人。講開又講，另一唐營成員石禮謙（大舊石），繼早前缺席「大和解」飯局後，尋日繼續缺席同CY會面，但聽佢嘅盟友何鍾泰講，原來大舊石仲未返港，但既然候任特首約到，佢哋都無謂拖，所以無等齊人。