政情：民記「籮底橙」戰九西惹爭議
民建聯一連兩日嘅路向營結束，表面上好似好和諧，其實內裏有火花四濺討論，有傳早年畀黨硬銷入政府嘅「籮底橙」、發展局局長政治助理張文韜密謀重返民建聯爭取出選立法會，甚至黨內流傳傾向留喺九西出選嘅黨內副主席李慧琼（Starry），願意讓路畀曾合作無間嘅張，自己轉戰區議會超級議席添。
張文韜突然有意重返該黨爭出線，亦影響該黨原先部署。眾所周知，建制派喺超級區議會係「坐二望三」，傾向留喺九西嘅Starry倘轉戰區議會超級議席，將要冒好大風險爭建制派嘅第三席，另一方面原本很大機會出選該議席、剛為人父嘅另一名副主席張國鈞或因而被犧牲。民建聯喺路向營又決定，一共派出十一隊名單參選立法會。
涂謹申尹兆堅選超級議席
此外，民主黨嘅選舉部署疑似假諮詢備受泛民非議，其中區議會超級議席話就會同泛民主派盡快傾吓，但尋日就率先公布會分兩張分別係涂謹申和尹兆堅嘅名單出選，呢啲真係典型嘅講一套做一套。
民主黨尋日決定，現任議員甘乃威同李華明唔再參選，而張文光就轉戰西九排二，目的係送排第一嘅黃碧雲入立法會。屯門區議員陳樹英喺新界西，與夫君李永達各自獨立成隊。