政情：朱鼎健打造高球商場
今年龍年，好多新婚夫婦都爭住生龍Ｂ，早幾日觀瀾湖主席朱鼎健（Ken）就傳出喜訊，當然唔係佢生龍Ｂ啦，而係佢投資咗五十億元人民幣（約六十一億五千萬港元）喺深圳北興建嘅國際城市綜合體「觀瀾湖新城」，將於十八個月後出世。觀瀾係世界級嘅高爾夫球場，估唔到由佢一手打造嘅「新城」入面，都有高球場。
「新城」匯聚酒店 、商務、購物、休閒、展覽及居住六大功能，咁大陣容，難怪阿Ken好似期待新生命出世咁緊張。新城入面個大型商場「MH Mall」係全球首個高爾夫球十八洞主題商場，除咗有全深圳首家高球推桿樂園外，仲會有全球首屈一指嘅保齡球品牌Brunswick同溜冰場，所以行街之餘仲可以做運動，真係鍾意運動嘅Ken先諗得出呢個構思。阿Ken平時係工作忙，呢類一站式建築群就啱晒佢喇。