中環出更：爆冷拉頭馬 大輝洗頹氣
尋日跑馬地馬場有賽事，參選特首落敗嘅唐英年「家臣」、立法會議員林大輝同家人齊現身，撐佢同太太蘇麗貞匹愛駒「太奇妙」，結果爆冷跑出。愛駒首次奪冠，帶挈林大輝穩袋三十八萬幾元獎金，一洗唐營失勢頹氣。佢興奮語帶雙關話：「做人要向前望，之前係遇到逆境，拉完頭馬就開始轉運喇！」
賽事之前，「太奇妙」本來賠率有成二十幾倍，卻於一分鐘內暴跌至十倍。開賽之後，「太奇妙」起初墮後尾二，到入直路開始發力，最終奪標。林大輝夫婦同母親及姨甥高興拉頭馬，老友都戥佢開心。除咗獎金之外，林大輝仲買咗獨贏、連贏、位置統統中晒，但佢堅稱冇大額投注谷賠率喎。
似有意爭連任立會
佢坦言，近期係面對唔少逆境，相信主要係指唐英年參選特首落敗，老友以為佢呢排會唔開心，事實啱啱相反。佢話「做生意梗有贏有輸，我做廠嘅，由草根階層做起，有咩未見過吖？」仲話人生有唔同階段，以前嘅事告一段落，唔好緬懷、唔好眷戀，呢個服務社會嘅平台冇咗，咪搵過第二個平台囉！問佢會否競逐下屆立法會議席，佢笑笑咁話，自己只做咗一屆，有條件連任，當然會繼續做，除非有競爭對手爭贏佢啦。睇嚟佢已經決定咗喇。
同場仲見到保良局副主席鄭錦鐘夫婦，同剛卸任副主席嘅顏金煒一同入場湊熱鬧。顏金煒話加入機構八年，都有啲唔捨得，但會務太繁忙，令到佢分身不暇，所以選擇退下來，但會留任顧問一年。佢話細仔Martin有加入扶輪社，希望囝囝可以繼承佢服務社會嘅責任。
卓妮