政情：高官議員 一窩蜂賞櫻
每年四至五月都係賞櫻花嘅好季節，好多高官、議員就趁之前復活節假期一窩蜂到日本賞櫻，唔係度蜜月就係慶祝結婚周年紀念。婚後極速做爸爸嘅立法會醫學界代表「怪醫」梁家騮，就同老婆去咗東京四日賞櫻兼補度蜜月，但怪醫竟然帶埋朋友一齊去，確係幾怪喎！
運輸及房屋局局長鄭汝樺（Eva）就同收得好密實嘅老公去咗京都賞櫻，慶祝結婚周年紀念。不過，可能Eva去嘅時候尚早，好多熱門賞櫻地點仲未睇到櫻花，搞到有啲失望。不過，正當Eva諗住帶住遺憾離開京都時，佢就喺醍醐寺前見到一棵巨型嘅櫻花樹，興奮到要喺櫻花樹下留影。
去日本嘅仲有立法會議員何俊仁，佢去京都玩足六日，相當識歎。不過，鐵頭仁睇到嘅櫻花開得唔夠燦爛，反而佢一走咗啲花就全開，為旅程帶點遺憾。雖然睇花不成，但佢就參觀咗由華裔美籍建築師貝聿銘設計嘅美秀美術館（Miho Museum），總算係有啲收穫。