港鐵喺龐大利潤下仍向政府提出加價百分之五點四，令市民生活百上加斤。立法會尋日討論港鐵加價，有議員批評港鐵賺得愈多，加得愈多，相當無良。工聯會葉偉明就批評，港鐵喺政府保護下賺取利潤，加價等於向市民搶錢，要求擱置加價，並推出月票優惠。雖然政府以「可加可減」機制做加價擋箭牌，但正如議員所講，大企業應該要有社會責任，唔應該吓吓賺到盡嘅。
