政情：網友交「波」不信任貪曾
立法會放完復活節假後，下星期三正式復會，而且連場好戲，連續有幾個動議辯論。心水清嘅會計界陳茂波（Paul），尋日特登喺社交網站facebook提醒網友，話當日會就煲呔曾貪盡海陸空嘅不信任動議進行表決，佢仲乘機問網友意見，點知班網友十居其九都叫阿Paul投不信任票。一向聽民意嘅阿Paul，唔知到時會唔會按照民意投票呢？
本報獨家踢爆煲呔曾貪盡富豪海陸空款待，煲呔曾一早已經名譽掃地，立法會下周三壓軸好戲，就係由議員陳淑莊提出嘅行政長官不信任動議。阿Paul嘅網友就對煲呔曾好不滿，有網友話，雖然煲呔曾得番幾個月任期，但點都要投不信任票「以儆效尤」，亦有人話煲呔曾做咁多衰嘢，一定要面對七百萬市民，唔可以就咁走佬，同樣叫阿Paul點都要投不信任票喎。
煲呔曾至今已盡失民心，奉勸其他建制派議員，無謂再包庇煲呔曾呢個負資產，好應該憑良心投票，否則只會被選民唾棄。