中環出更：林順潮深圳開眼科醫院
愈來愈多名醫自立門戶搵真銀，好似離開中大眼科及視覺科學系高職嘅眼科名醫林順潮，年初喺中環私人執業。做得老闆就預咗犧牲，所以佢開診所之外，一方面要兼顧學術研究、扶貧復明，而且仲要照顧家庭，搞到一日廿四小時都唔夠用。
林順潮搵錢之餘仲不忘回饋社會，由佢一手湊大嘅「亮睛工程」，三月初喺河南開設新眼科中心，連同其他省市，已總共有廿幾間，造福唔少貧苦大眾。神州潛力無限，佢都睇好前景，今年攻入深圳開眼科醫院，預計年底開幕，若然成功，應該「錢」途無限。
恨生多幾個 太太話抖抖
老公負責搵錢，靚女又賢慧嘅林太李肖婷就相夫教子，每逢周末，一家四口齊跑步健身。大女林昭悅已經四歲，細仔林昭博就兩歲，兩個似足爸爸咁好學，長大後，大有潛質繼承爸爸衣鉢做醫生。林醫生話，好恨生多幾個，但太太話想抖抖先喎。