政情：田氏兄弟氹細路有計
兒童節將至，自由黨榮譽主席田北俊同佢細佬新民黨副主席田北辰尋日不約而同去咗同小朋友玩。大少山長水遠入沙頭角同小朋友燒嘢食，二少就網購咗成萬隻復活蛋送畀小朋友。兩兄弟喺政治上分道揚鑣，又分別喺新界東同新界西參加立法會選舉，竟然有少少心有靈犀。
田少尋日提早同小朋友慶祝兒童節，佢同百幾個小朋友去咗沙頭角嘅動物農莊燒嘢食。班小朋友喺農莊睇吓牛、睇吓羊，又遊吓菜花田，不知幾開心。不過最開心都係收禮物嗰一刻喇，皆因田少好識氹細路，男仔就送玩具車，女仔就送毛公仔。
田二少就買咗成萬隻復活蛋送畀幼稚園同各區嘅小朋友畫，仲同佢哋畫埋一份添。但依家物價貴，喺香港買雞蛋咁大隻嘅復活蛋要兩蚊幾一隻，但網購只係兩毫子，所以田二少就上網買，等啲小朋友可以發揮創意。