中環出更：洪為民補飛拎姚明簽名
博鰲亞洲論壇喺海南開波，中國籃球巨人姚明都有現身，菁英會主席洪為民（Witman）見到佢，爭住上前攞簽名。原來兩人去年同場時，只記得影相留念唔記得攞簽名，一度令Witman囝囝好失落。
菁英會一眾核心成員見到偶像好興奮，施榮忻、莊家彬、湯珈鋮及鄭詩韻今次首次見姚明「真身」，驚訝對方高度，的確名不虛傳。霍啟剛見過姚明，所以見怪不怪。但拍埋影大合照，有如小人國與大人國，場面有趣。
姚明自知高人一等，主動走近Witman身邊：「不如我坐低傾偈。」Witman醒起囝囝吩咐要拎簽名，馬上拎出紙筆，姚明亦有求必應，仲寫埋Witman囝囝個名，認真有心。
查實兩人去年曾喺博鰲青年領袖圓桌會議上齊發言，今年再度同場，就《青年人的幸福》各抒己見，都算有緣。Witman話，唔少人將成功等同幸福，其實兩者並非必然，只要懂得欣賞擁有嘅東西，幸福就在眼前。