中環出更：李文恩兄弟鬥「包裝」雙贏
馬場如戰場，兄弟都變敵人。尋日沙田馬場其中一場賽事，理文造紙董事總經理李文斌（Edmond）嘅愛駒「包裝之寶」同哥哥李文恩（Norman）嘅「包裝博士」撞啱同場出賽，結果哥哥拉頭馬，弟弟攞第三，都叫做雙贏啦！
Norman匹「包裝博士」奪冠，除咗穩袋六十八萬幾元獎金外，仲因為呢匹係自購馬，首年出賽拉頭馬，就可額外獲得六十萬元特別獎金，真係喜上加喜。Norman太太Lorinda興奮到跳起，佢笑言已經好耐冇拉過頭馬，一定會好好慶祝。
講番兩匹駿駒，Edmond話當初買馬嘅時候，兩兄弟各自睇中對方匹馬，仲叫對方買下，點知兩匹都咁跑得，兩兄弟真係有眼光。Edmond尋日已經正式卸任仁濟主席，佢話當堂輕鬆晒，之後可以專心工作。
嚴玉麟有十萬元落袋
電子業商會副會長嚴玉麟（Stanley）同太太、大仔Jacky夫婦及細仔Jeffrey一家齊入馬場，撐佢隻愛駒「電子福星」。卓妮問佢對隻馬有冇信心，佢笑笑口答「出親都有機會o架啦！」結果跑第三，都有十萬元落袋。
Stanley話，復活節得幾日假，唔飛咁遠喇，一家可能去上海叉吓電喎。同場仲見到康泰旅行社董事總經理黃進達（Jason）同爸爸入馬場，佢話復活節會好忙，唔會出門旅行。
卓妮