政情:中環出更:大紅人高永文畀「媽打」整蠱

位於西九龍海庭道嘅紅十字會新總部大樓尋日舉行動土禮,唔少高官、政商界名人都有出席撐場。其中最惹人注目嘅,相信係發展局局長林鄭月娥及著名骨科醫生高永文嘅出現,皆因有傳佢哋獲邀加入新一屆政府。林鄭依舊拒絕回應傳聞,但高永文就話,如果新政府有人向佢招手,佢都會認真考慮喎。

挺梁嘅高永文變成紅人,就連作為老友嘅前民政事務局常秘「媽打」李麗娟都整蠱佢,笑笑口話唔知叫佢「主席」(醫管局)定係「局長」(食物及衞生局)好?高永文聽完好淡定話:「梗係叫主席啦,因為我係紅十字會醫護服務部主席嘛!」高永文坦言,佢都係鍾意做番依家嘅臨床及義務工作。

紅十字會新大樓動土

合和集團主席胡應湘喺特首投票當日唔肯透露投票畀邊個,話怕畀太太鬧喎。卓妮尋日見到佢太太胡郭秀萍在場,佢就話唔會鬧老公,亦唔會過問老公投邊個,事關老公係一個有自己諗法嘅人。前天文台台長林超英都有到場,佢期許特首當選人梁振英來自基層,勿忘記基層市民。

講番紅十字會新大樓興建,擔任籌款委員會主席嘅胡太話,依家總共籌到三億四千多萬元,其中一億二千多萬元由邵逸夫捐出,令佢非常感動,亦有信心籌埋餘下幾千萬元款項。

不過,胡太話香港人好鍾意做善事,但就過於着眼賑災工作,其實機構總部嘅重建都好緊要,因為無大本營就會阻慢行政工作,分分鐘連善事都無得做添,所以佢希望全港市民出一分力,繼續募集重建經費。卓妮仲見到慷慨捐錢嘅玩具大王蔡志明太太李惠莉去湊熱鬧,蔡太笑言自己因為怕痛,所以從來未捐過血,但唔出血,出錢都一樣得嘅啫!

卓妮

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報