政情：潮商App激發全球創意
潮流興玩智能手機拍短片，緊貼時代腳步嘅潮州商會，去年成功開發手機應用程式「潮人潮App」後，愈玩愈勁，早前又搞個「潮人潮Jokes歡樂相片及短片大賽」，吸引城中玩家發揮天馬行空嘅創意，熱烈參賽。潮商副會長胡劍江（Michael）話，經過半年努力，佢哋個App嘅點擊率迅速飆升，全球排名倍升至第二百萬名，發展潛力無限。
潮商上周末喺會所搞咗個短片大賽頒獎儀式，會長陳幼南同太太拍拖出席，佢笑稱，得獎者唔一定係潮州人，但就肯定係潮人喇！身為百年老店胡良利珠寶揸弗人嘅Michael，都慷慨贊助意大利首飾作為獎品，出錢又出力。今次比賽最搶鏡嘅係獲得亞軍嘅《狗狗耍太極》短片主角、七歲嘅貴婦狗，非常精靈，難怪潮青副主任胡炎松笑笑口話，如果唔係睇見隻狗眼仔睩睩，仲以為係隻玩具狗添！