特首選舉候選人唐英年夫婦喺九龍塘約道大宅僭建地牢醜聞，連學校都用嚟做反面教材。日前網上流傳一份中學嘅英文習作，竟然用咗網民惡搞唐唐嘅漫畫，要求學生回答漫畫中人係邊個。做習a作嗰位中五學生就答話，係今年特首候選人「Henry Tang」（唐唐洋名）同「Mrs Tang」（唐太），真係醜事傳千里，連學生都知佢哋嘅醜行。
唐唐被踢爆僭建「地下行宮」之後，創意無限嘅網民創作咗唔少惡搞唐唐嘅漫畫。其中一張最廣為流傳嘅，就係畫中唐唐喺地下酒窖歎紅酒，唐太郭妤淺就着住紅色比堅尼係酒窖上面嘅泳池暢泳。
畫中嘅唐唐喺酒窖天窗見到老婆時，當堂噴出紅色液體，唔知係噴紅酒定嚇到噴血。點知呢幅佳作就成為咗中學生嘅英文習作。
對於呢幅惡搞漫畫成為功課，超過一百個網民讚好。話時話，唐唐啲女好似仲讀緊書，唔知佢哋做功課時見到呢幅圖會有咩反應呢？