政情：逍遙范太坐郵輪避世
全國人大常委范徐麗泰唔蹚特首選舉嘅渾水，所以最逍遙自在，早前佢印印腳坐郵輪遊亞洲，吃勻日本魚生、韓燒牛肉及上海小籠包，名副其實去到邊食到邊，認真歎。
范太尋日以馬會大董身份現身沙田馬場，講起二月中嘅郵輪之旅，滔滔不絕。此行佢同九十多歲奶奶及姑仔同行。佢哋由香港出發，經上海去日本長崎、南韓釜山、台北，尾站係北京，行程共十一日。范太大讚接待單位安排周到，有專車接送無煩惱，但因為怕拎嘢，手信就少買，反而把握機會上岸大飽口福，嘗盡亞洲美食。
坐郵輪期間，特首選舉日日爆新料，傳媒不停打電話畀范太問回應，不過佢身在海上，唔方便聽電話，皆因長途電話費好貴，講幾句隨時收幾十蚊，所以寧願選擇與世隔絕，樂得清靜。