政情：盧文端揀特首要問老朋友
上周五特首辯論會，唐英年大爆行會機密，令唔少特首選委嘩然，可能要重新考慮投票意向。選委之一嘅福建幫頭目、全國政協委員盧文端尋日同囝囝盧金榮一同入馬場，佢好神秘咁話，要問過一位識咗好耐嘅朋友意見，至決定投票畀邊個。
盧文端話，投票除咗要睇候選人嘅表現、政綱外，仲要問一位識咗廿九年嘅老友意見喎。盧文端做咗十四年全國政協委員，之前又做咗十五年福建省政協委員，咁加埋咪剛剛廿九年？即係話，佢呢位朋友應該係佢做省政協時已經認識。不過究竟係邊位，佢就點都唔肯講。
同屬選委嘅工業總會副主席劉展灝為唐唐提名，佢話現階段唔會轉軚，更唔會投白票。太子珠寶鐘錶主席鄧鉅明就話，上星期五個辯論好有娛樂性，仲話睇一次唔夠喉，要上網重溫多次。