政情：爛兄爛弟 曾唐輪住獻醜
特首選舉舉行至今，候選人梁振英不斷受到來自四方八面嘅攻擊，除咗要應付主要對手唐英年陣營嘅明槍暗箭外，仲要承受「唐英年B隊」惡名民主黨，以及「唐英年C隊」特區政府無的放矢嘅謾罵同指控。堂堂政府淪落到做人哋啦啦隊，如果唔係煲呔曾授意，相信班官員都唔敢做得咁明目張膽。實際上，過去幾個月煲呔曾同唐英年相繼爆鑊，效果就好似互相掩護咁。
煲呔曾同唐唐嘅衰嘢，喺呢幾個月嚟真係互相「輝映」。特首選舉去到中段，唐唐被揭發大宅僭建，又畀我哋刊登咗疑似佢同一位女士來來往往嘅情慾電郵，喺全城鬧哄哄之際，東方報業集團又獨家揭發煲呔曾「貪盡海陸空」嘅邋遢事迹，結果又引起全城關注，煲呔曾變成過街老鼠，最終被迫去到立法會接受議員公審，當住七百萬港人面前道歉。東方報業集團仗義執言，連續多日以頭版報道跟進事件，最終仲引發幾千人齊齊打煲呔曾小人，都咪話唔大件事。
唐唐自殺式襲擊 貪曾鬆口氣
以為去到呢度，曾蔭權已經走投無路啦，點知唐英年仲好嘢，就喺呢段時間，不斷喺網頁撰文，行文仲要一改以往扮晒親切和諧嘅作風，一時鬧對手既狼且辣、一時叫人小心梁振英，總之就好似完全變咗兩個人咁，全港市民嘅焦點好多都轉移咗去佢身上，煲呔曾可暫時鬆口氣。
唐英年早幾日喺電視辯論上面自殺式襲擊對手，務求做到玉石俱焚，自己唔贏都唔畀你勝出，呢啲咁陰騭嘅行為，令到全香港嘩然，客觀效果又係令到全港市民暫時忘記煲呔曾做過啲乜嘢衰嘢，總之兩個人可以做到互相掩護嘅效果，佢兩個唔係「爛兄爛弟」係乜先？
前日有電視台記者去到教堂門口等煲呔曾，見住佢笑容燦爛咁行出嚟時，竟然唔再追問煲呔曾涉嫌貪污呢單嘢，而係去問佢對於唐英年爆行會內容有乜睇法，其實煲呔曾貪盡海陸空，仲有好多嘢未回答。佢哋兩兄弟衰嘢輪住出，想話佢兩個唔係一樣咁爛都唔得。