中環出更：春裝耀馬場爭妍鬥麗
沙田馬場尋日舉行打吡大賽，吸引唔少官紳名流入場湊熱鬧。踏入三月中，寒氣盡退，尋日氣溫接近攝氏三十度，大家急不及待換上色彩斑斕嘅春裝，馬場頓時生氣盎然。
溥儀眼鏡店老闆邱子傑（Jeffrey）同太太李茂琪（Margaret）十指緊扣到場，齊齊撐愛駒「追月」。Margaret情迷香奈兒，全身由帽、戒指、手鈪到黃色連身裙，都係幫襯Chanel。二人仲着埋情侶鞋添，鞋面黑色、鞋底紅色，行起上嚟步伐特別一致。
下月有復活節長假，Jeffrey話打算同太太及一對仔女去歐遊七日，途中會去倫敦參觀藝術館。Margaret仲話，係對仔女主動要求要去藝術館嘅，原來一家都咁有藝術氣質。
李氏兄弟帶愛妻撐愛駒
仁濟主席李文斌（Edmond）同哥哥李文俊（Raymond）嘅愛駒「包裝之寶」及「包裝選擇」分別出賽，二人當然帶埋愛妻一齊撐場。Edmond太太Amanda穿上老公送嘅綠色Gucci春裝，青春可人；Raymond太太Money則着住鮮紅色嘅春裝，高貴大方。
前仁愛堂主席史立德（Allen）同太太顏景蓮及囝囝史昊洺嘅「叻先生」以大熱姿態奪標，穩袋近三十萬元獎金，佢哋一家都高興萬分，遇正Allen早幾日牛一，真係雙喜臨門。佢話，當日同一大班老友喺私家遊艇上面開party慶祝，仲獲愛妻送贈Versace靚呔做禮物，真係冧到爆。
卓妮尋日仲見到海皇粥店嘅老闆蕭楚基，佢預告四月將會有新馬上場，係同朋友合買嘅，已經命名為「心滿意足」。
佢話，復活節會去曼谷度假，仲會順道拜「馬神」。原來佢有年去完拜馬神，一年中咗十三次孖T，搞到佢都心郁郁想再去拜吓，希望贏多啲馬喎。
卓妮