港府宣傳廣告話，家陣市民醒目咗，祈福黨冇咁易得手喎。查實呢啲只不過係講者自講，信唔過架。消委會舊年接獲一百一十五單涉及保險服務嘅投訴，近一半同銷售手法有關，呢啲咪就係祈福黨嘅手法咯。
呢嗱，有位六十歲婆婆買咗份供款三十個月嘅投資壽險，月供四萬幾元，諗住五年後退休慢慢搣。點知供款期滿想攞番本利，至發現合約副本寫明買嘅係廿年期保險、總投資額達一千萬元，遠遠超出佢嘅負擔能力。唔使問阿貴，呢份保險根本就係騙局，保險經紀連老人家都呃，真係冇陰功！
投資陷阱無處不在，另一位七十六歲嘅婆婆被銀行職員游說買咗一份保費廿五萬元嘅儲蓄壽險，話就話五年期，原來要十年後至可以攞番保金同部分紅利。咁都得？十年後呢位婆婆都八十六歲喇，點等喎？銀行職員擺明誤導長者啫，仲有冇無良啲吖！
老吾老以及人之老，公公婆婆風燭殘年，理財方面本應得到更多關懷同協助，好好利用有限積蓄安度晚年。家陣有人居然連長者嘅棺材本都唔放過，諗埋啲邪門歪道，將佢哋當羊牯劏，當提款機撳，簡直大逆不道，危害性比起祈福黨有過之而無不及。話時話，騙徒為所欲為，呃得就呃，而監管機構竟不聞不問，關人個關，佢哋根本就係幫兇！
其實，保險陷阱只不過係冰山一角咋，金融業嘅情況仲得人驚吖。唔信？大家睇吓嗰班雷曼苦主就知喇。金融機構唯利是圖，向基層市民推銷風險極高嘅所謂迷債，連老人家都唔放過，搞到唔少長者血本無歸，欲哭無淚。銀行無良，罪孽深重，而港府監管不力，放任垃圾債券禍害港人，損害香港國際金融中心形象，更係罪加一等！
銷售騙局層出不窮，跛腳鴨政府監管失職，唔係幫兇又係乜嘢？嗱，好似層壓式推銷咁，早已經臭名昭著，天怒人怨，全球各地紛紛禁止，唯獨喺香港處處開花，多年來民間要求取締呼聲不斷，港府一拖再拖，直至近年至修例。仲有預繳式消費陷阱，更加係無日無之，當局監管不力之餘，各部門又互相卸責，消費者投訴無門，叫天不應，叫地不靈。
投資陷阱遍地開花，黑店醜聞不絕於耳，偷呃拐騙無日無之，計功夫茶話齋，香港金融中心嘅招牌遲早要改成「騙徒中心」，消費天堂亦淪為劏客地獄。