政情：逃避「苦」纏 曾太想食甜果？
一年一度嘅花卉展覽尋日喺維園開幕，同往年一樣，煲呔曾老婆曾鮑笑薇出席開幕禮，順道參觀今年以「花之旅」為題嘅各式各樣花卉。不過，今時唔同往日，煲呔曾爆出貪盡海陸空醜聞，連累老婆喺七一後無家可歸，難怪曾太尋日都笑容唔多，就連花卉展工作人員都疑似抽水，向曾太推介食苦味都變甜嘅植物果實「神秘果」。
感懷身世尋甜味
「神秘果」之所以咁神秘，原來係食後嘅一段時間內，再食任何嘢都係甜味嘅，曾太似乎好有興趣，莫非佢想為依家苦不堪言嘅處境，尋找一點甜味？的而且確，曾太尋日似乎心事重重，除咗影相外，面對一片花海都唔見佢展露笑容。難得曾太出現，我哋就單刀直入問曾太七一後有冇地方住，但佢就低頭沉默，睇完花後急急腳上車走人。
我哋翻查資料，原來坐緊監嘅台灣前總統陳水扁，喺○二年參觀鹿港龍山寺時都有試食過神秘果，唔知煲呔曾會否學阿扁咁食吓神秘果呢？