政情：民記鄉事派 夾擊何君堯

梁志祥富經驗樁腳多

對於民建聯會喺新界西出三隊參選，早前曾經傳出該黨副主席蔣麗芸會披甲上陣，但原來一切都只係幌子，真正會出選嘅係現任元朗區議會主席梁志祥。消息人士話，梁志祥除咗係區議會主席之外，仲係新界社團聯會會長，民建聯可以喺新界打穩陣腳，聯會功不可沒，加上佢喺地區直選經驗豐富，樁腳亦多，難怪可以雀屏中選，據講民建聯仲容許梁志祥掛埋聯會個名義去參選添。

最近我哋亦收到另一個消息，話部分元朗鄉事派成員同地區猛人已經決定全力為一位低調商人助選，呢位低調商人早前仲同一班支持者成立咗個組織，仲擔任組織嘅會長，擺明有心大展拳腳。雖然呢位商人嘅知名度唔高，但其實已經密密做地區工作，加上鄉紳動員為佢助選，對選情都有一定嘅幫助。

六隊競逐 何形勢不利

有政界中人分析，依家肯定喺新界西出選嘅建制派已經有工聯會加民建聯一共四隊，剩餘嘅建制派選票唔多，如果低調商人真係加入戰團，情況對早已蓄勢待發打算出戰新界西嘅何君堯相當不利。消息話，何君堯喺啱啱過咗嘅星期日特登約咗班離島鄉紳食飯，離島屬於新界西範圍，據聞佢喺席上並冇講到選舉嘅嘢，但打好關係嘅用意就相當明顯喇。

當然，政治一日都嫌長，最終點擺位，真係要到提名截止日先知，但如果上述嘅選情屬實，新界西肯定就係繼新界東之後另一個極度混亂嘅戰場，到底各黨派及參選人點樣可以突圍而出，大家真係要靜候事態發展喇。