中環出更：彤叔臨別贈言見感性一面
三月一日起正式交棒畀長子鄭家純嘅新世界發展前主席鄭裕彤，已經過咗大半個月享清福嘅日子。尋日新世界發展公布截至去年底嘅中期報告，彤叔最後一次以主席身份執筆主席報告書，內容充滿感性，離情依依，引用《道德經》外，仲引用埋古代詩人白居易嘅《長恨歌》，同以前開口埋口講生意經好唔同。
引用《道德經》《長恨歌》
八十六歲高齡嘅彤叔話，退休後將開展人生新一頁，安享退休生活。佢引用《長恨歌》嘅「臨別殷勤重寄詞，詞中有誓兩心知」兩句，話過去四十二年來，佢同員工一齊為集團打拚嘅點滴，盡在不言中。不過，人始終都要退休，彤叔引述《道德經》話：「天地尚不能久，而況於人乎？」字裏行間充滿離情。
依家集團進入「純官時代」，彤叔不忘交代兩句，話現時社會風雲色變，萬物變化錯綜繁複，係機遇定係挑戰，只係觀點與角度問題，只要不驕不躁，心如明鏡，等待時機成熟，有條不紊地行動，自然就可以取得成果。