中環出更：袁振寧賣日貨 助災區振經濟
中環行得多，卓妮間中會過尖沙咀行吓，有日行過柯士甸道，就見到博愛醫院總理、縱橫遊業務顧問袁振寧（CN）忙出忙入，原來佢正籌備同日本北海道及東北七縣政府，合作喺區內開一間專賣當地物產嘅「Japan Super」店舖，以幫助災區重振經濟。日本九級大地震啱啱滿一周年，災區嘅悲慘遭遇再次勾起大家嘅記憶，CN積極行多步，熱誠十足。
逾千物產目錄 方便訂購
「Japan Super」喺正縱橫遊柯士甸道分店隔籬嘅樓上舖，卓妮趁機去先睹為快。店內陳列過百種物產，大部分係香港未有得賣嘅，包括貴過清酒嘅宮城縣黑醋、香腍嘅山形縣大米，仲有CN至愛嘅青森縣蘋果汁等。店內亦提供逾千種物產嘅目錄，方便客戶直接落柯打訂購，唔使局限於購買店內嘅陳列品。
今次係CN接手家族生意後，首次由旅遊業擴展到貿易，難怪佢咁緊張，畀足心機為下個月中旬新店開幕做好準備。講起間店舖，原本去年三月底就要開張，但咁啱遇上大地震，CN話，當時入咗大批貨都唔知點算好，好彩博愛醫院眾總理熱心認購，佢亦將籌到嘅二十萬元貨款捐畀災區，大家齊齊做好事。
卓妮