中聯辦宣傳文體部部長郝鐵川早前批評香港大學關於港人對國民身份認同感嘅民意調查，指係唔科學同唔合邏輯，畀人質疑佢干預學術自由。佢日前接受樹仁大學學生刊物《仁民報》嘅訪問時講番件事，除咗話佢發表言論只係捍衞自己嘅權利外，仲講到中港矛盾，佢以談戀愛嚟比喻中港關係。
郝鐵川話，一對戀人肯定會有矛盾，若真心相愛，問題終歸能解決，仲話絕大部分內地同胞對港人係充滿敬意，覺得港人文明、講禮貌同高質素，又認為大部分港人都係愛國愛港，唔承認自己係中國人嘅港人，只係極少數。其實要內地人同香港人認同大家係真心相愛，係最高境界，但亦係最大難度囉。
至於雙非孕婦來港產子嘅政策，郝鐵川首次承認政策係低估咗實際狀況，依家變成超額，但佢始終死撐話內地人喺香港生仔可以增加勞動力，「是福不是禍」。受影響搵唔到位生仔嘅香港孕婦，唔知覺唔覺係福呢？