政情：麥靖宇頻頻去中聯辦
特首辦常任秘書長麥靖宇早幾日現身西環中聯辦，但神態異常鬼祟，原來佢係去同中聯辦人員進行工作會面同開例會。事隔兩日，尋日麥靖宇再次坐政府座駕去中聯辦開會，但今次就加埋特首辦主任梁卓偉，兩人喺中聯辦逗留接近一個鐘頭後才離開。
梁卓偉發現記者愕然
尋日朝早十一點半鐘，一駕灰色嘅AM七人車直駛入中聯辦停車場，但由於車速太快，睇唔清車上有啲乜嘢人。四十五分鐘之後，謎底終於解開，原來車上嘅又係麥靖宇，而且仲有梁卓偉。梁卓偉發現有記者在場都有少少愕然，但之後都有對住鏡頭笑，而麥靖宇就一貫木獨表情，不動聲色。
特首辦同上次一樣都係同一個回應，話特首辦同中聯辦不時都會進行工作會面或會議，而梁卓偉同麥靖宇尋日去中聯辦只係一般工作會面喎。