中環出更：蕭楚基改革粥店吸人仔
百物騰貴，餐飲業叫苦連天。海皇粥店集團執行董事蕭楚基（Caecage）都受到成本上漲問題困擾，最近佢就作出新嘗試，兼做茶餐廳生意，仲預備進軍內地市場添。原來佢三個月前已將位於沙田嘅粥店轉型做茶餐廳，仲易名為「盈翠」，提供海南雞飯、咖喱、粉麵甚至甜品，以新潮格局同餐飲路線主打年輕人市場，滿足貪新鮮嘅港人。
嘆港舖租太貴
Caecage仲話，未來會進軍內地賺人仔，喺東莞開一間樓高兩層、面積七千方呎嘅茶餐廳，但就會用番「海皇」個名，以品牌招徠內地顧客。佢無奈話，香港舖租實在太貴，所以想試吓近近哋喺東莞開第一間茶餐廳，試吓反應先，預計下個月開業。佢話公司計劃雙線發展，即係粥店數目唔會減少，即係市民可以有粥食粥，有飯食飯囉。
卓妮