中環出更：啟剛世紀婚禮九月迎娶晶晶？
立法會議員霍震霆公子霍啟剛同跳水公主郭晶晶盛傳結婚多時，最新講法係盛傳佢哋今年九月喺香港結婚，仲話打算會喺機場亞洲博覽館筵開六百圍，如果係真嘅話，相信又係一個世紀婚禮。霍震霆接受查詢時首先話：「唔係、唔係。」之後就話唔係九月又未定場地，訂咗話你知喎，繼續神神秘秘大賣關子。
傳亞博館擺600圍
我哋曾經就此四出打聽呢個世紀婚禮傳聞係真定係假，好多啟剛嘅好友都好口密，唔敢隨意洩漏風聲，亦都有人話，相信啟剛嘅世紀婚禮會介乎九月或十月，但以霍家喺中港嘅人脈關係，要擺六百圍絕對唔出奇，在於同日擺定係分幾日擺嘅啫，一日擺晒就相信只有機場亞洲博覽館至夠大。
有政界中人話，喺亞洲博覽館擺酒都有好處，因為可以方便霍家喺內地及海外嘅朋友來港飲喜酒，一落機可直接到博覽館，太夜嘅話又可以住一晚機場酒店，免卻舟車勞頓。話時話，過去好多富豪娶新抱都會疏爽大派利是，唔知霍震霆會唔會大手筆捐款畀體育界呢？