修理水箱爆喉 房署冇交代

公屋戶一項簡單的水箱維修工程,一修再修後竟爆喉收場!事件中的廁所水箱原本只有輕微滲漏問題,但經過房署兩度維修後,卻突然爆鹹水管,全屋變成澤國,電器傢俬無一幸免被鹹水淹浸,戶主矢言要向房署追究到底。立法會議員直指原本簡單的工程竟搞出「大頭佛」,促就事件徹查,防止再出現類似事故。

「我諗住小小嘢整一次就得,點知一次唔得要整第二次,依家直情爆埋喉添!」事件發生於西灣河興東邨興祖樓低層單位,謝太早前發現廁所水箱漏水,房署職員兩度上門維修,第二次維修後翌晨,謝太突獲鄰居來電,指有「洪水」從其單位湧出,並正襲向鄰戶,始知家中水管爆裂,「啲水浸到上腳眼,後尾先知係鹹水,啲電器浸晒全部唔要得!」

水箱維修變鹹水管爆裂,但至今仍「死因」不明,謝太指房署由始至終仍未交代事發緣由,亦未提及賠償責任,只派員上門更換喉管即求了事,「試過叫佢(房署)搵番嗰日嘅師傅上嚟換,順便交代番,但結果就派咗另一個人嚟,根本就唔想交代!」謝太指房署一直避談賠償事宜,只着其自行記錄損壞項目及數量,隨後再作呈報,但已搬離原位的家具是否可放回原位,甚至索償途徑等俱未有相告,坦言對房署處理手法深表不滿,聲言會就事件責任追究到底。

事前全面檢查可免意外

興東邨物業服務辦事處發言人指出,有關爆喉位置乃水箱入水閘掣前之入牆接駁位置,維修組職員只曾為住戶更換水箱內的波曲,並未有觸碰該接駁位,亦沒有打鑿任何喉管,故未能確定爆鹹水管的確實原因。發言人又重申,當日職員曾觀察水箱及水管,確認沒有滲漏才離開,而在發生爆喉事件後,已即時派員清理積水,並安排更換鹹水喉管,至於索償申請則已交由公正行跟進。

香港專業教育學院(摩理臣山)產業及設施管理系高級講師歐陽耀南表示,導致水管爆裂最大機會乃由於水管早有磨蝕,「換波曲只係一個好簡單嘅工程,整唔實就會漏水,但如果整得太緊而水管本身又脆弱嘅話,一受壓(力)就會爆水管!」

「唔知事發原因並唔係一個解釋事件嘅理由,房署喺維修嗰陣就應該做全面檢查,避免意外發生。」立法會房屋事務委員會副主席王國興認為房署應該盡快找出爆水管的原因,檢討處理程序,防止同類事情再次發生。

記者:阮佩君

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報