國家領導人嘅講話一字一句都經過精雕細琢，有時有意無意之間更加會暗藏玄機。
日前有國家領導人喺北京寄語港澳政協委員「兄弟齊心，其利斷金」八個字，恰巧呢八字真言其中「齊心」兩個字，同民望高企嘅特首候選人梁振英（CY）競選口號「齊心一意撐香港」脗合，而且「齊心」又係有關領導人母親嘅名字，莫非呢個就係中央對本月廿五日特首選舉嘅重大啟示？
正當大家將焦點集中喺國家領導人同港澳政協握手嘅先後次序時，有心水清嘅朋友就提醒大家，其實「兄弟齊心，其利斷金」呢八個字先至係暗藏玄機，因為當中嘅「兄弟齊心」，其實同CY嘅競選口號首兩個字不謀而合，反問啲鍾意揣摩上意嘅人，呢一個啟示仲唔夠明確嗎？
如果根據呢位朋友咁講法，莫非中央已經唔再用「握手」嚟暗示特首人選玄機？究竟孰真孰假，呢個就留待大家判斷喇！