政情：李少光收荔枝被質疑
煲呔曾貪心大小通吃，連雞菜都唔放過，估唔到「黑狗」偷食，連累埋其他局長都被人質疑。有知情人士向本報爆料，話保安局局長李少光近四至五年都收到由內地官員送贈嘅增城荔枝，每年荔枝旺季都十幾籮咁送來港。報料人話，李局長根本食唔晒十幾籮荔枝，於是好慷慨咁同朋友分甘同味。
有紀律部隊老友就話，上面啲公安老友好客氣，送荔枝好普通，一啲都唔出奇，但凡食得落肚嘅，通常會分畀同事食，千祈唔好獨食，否則好容易食到熱氣生「飛螆」。如果係實物禮物嘅話，即使係一個鎖匙扣仔，都要申報，否則就好麻煩。
保安局發言人無回答光哥有否收過荔枝，而荔枝係咪來自增城、係咪有十幾籮咁多、邊個有份食，一概都不作回應，只係強調問責官員須遵照政治委任制度官員守則，以及有關利益申報及接受利益嘅規定，官員須保存一份記錄冊，記下官員或其配偶藉着其官員身份收受禮物或物質上嘅好處。