政情：田二少投白票損民望
唐營選情有變，近日就有人發起投白票行動，企圖嚟個一拍兩散。除咗來自商界嘅自由黨榮譽主席田北俊話會投白票外，連佢細佬新民黨副主席田北辰都聲言「暫時傾向投白票」，真係「其利斷金」。
田二少尋日就喺社交網站表達有意投白票意向，但隨即被網民批評「非唐不投」嘅做法，難免令人覺得佢兩兄弟官商勾結，話唔想投票就不如唔好做選委喎。
有網民直斥田氏兄弟話：「你哋應該睇民意，唔係base on你喜唔喜歡！邊個投白票，第日你個人或貴黨參與直選，就『票債票償』！」總之網民唔支持佢投白票。
面對咁多不滿聲音，田二少嘅回應都有啲無奈，強調投白票只係暫時嘅傾向。不過，有網民就教精田二少要慎言，應該向市民講「未有傾向投畀邊個候選人」，好過話傾向投白票，否則只會令選民失望。