政情：(目及)實貪曾 靠第四權

訪京三日後，煲呔曾尋日黃昏喺北京總結訪京之行，佢話見過好多領導人，具體唔方便講，但全部都支持佢嘅工作同依法施政，仲講咗好多鼓勵嘅說話添。既然獲領導人支持，煲呔曾梗係賴死唔走啦，所以佢唔肯喺廉署調查佢期間停職，聲稱有好多嘢未做完喎，包括金融風暴未完、特首交接嘅問題同民生問題，就連老人家兩蚊搭車優惠都關佢事，所以行唔開o架。不過，當被追問租住深圳「禮賓府」解約一事時，佢又變臉扮死狗，露出一副苦情樣話：「我依家……關於東海花園，我僱用咗專業人士同業主接觸，（處理）退租嘅事情」，然後又呻話：「七月一日後住嘅地方，依家都未有着落」，扮晒可憐咁，大家咪畀佢呃到呀！

濠住酒店 卸膊囝囝

當被記者要求佢解釋○七年到澳門入住威尼斯人酒店套房一事，佢就繼續扮可憐，回答前長嘆一聲「唉……」，解釋話因為佢個仔去澳門度假，入住嘅套房中有一個多餘嘅臥室，於是咪邀請佢兩公婆過去一齊過聖誕節囉。估唔到佢今次將責任賴晒落個仔身上，唔話佢無賴都唔得喇。煲呔曾尋晚返到香港，記者問佢市民兩次遊行叫佢落台，佢點睇，點知佢無答就走咗。

煲呔曾上星期去立法會被議員公審，表現得無限悔疚，熟悉佢脾性嘅人就話，佢一定係對自己貪得唔夠多感到後悔。不過，隨着立法會議員有意放生煲呔曾，謝偉俊提出彈劾議案都要暫時收回。煲呔曾貪盡海陸空，對香港廉潔嘅核心價值蓋咗一隻大黑豬，港人因為呢個特首而蒙羞，點知事情去到班平日懶係公正嚴明嘅議員手上，竟然包庇煲呔曾，真係唔知乜嘢世界。

事到如今，靠嘅只能係第四權力，就係市民嘞，觀乎《東方日報》同《太陽報》源源不絕揭發煲呔曾貪婪嘅醜行，就知道今次事件已經發動咗唔少市民，佢哋啟動自己監察力量，傾囊爆料，亦希望市民繼續爆料。惟有市民同傳媒監察，大細都貪嘅煲呔曾，先可以無所遁形。