中環出更：張建宗撐社企Cafe 申報避嫌
東華三院旗下社會企業愛烘焙餐廳（iBakery Gallery Cafe）喺添馬艦試業咗一排，尋日正式開張大吉，勞工及福利局局長張建宗同東華一班總理齊撐場。張建宗致辭時笑笑口話要申報利益，事關官員甚少為食肆主持開幕，但呢間餐廳就例外，因為係民商官共同參與，而且又係政府總部嘅亮點，所以點都要支持吓喎，好似暗寸煲呔曾攞着數無申報利益咁。
原來張建宗平時都同啲社福機構人員去iBakery餐廳食飯開會，每次都柯打番茄薄餅同三文魚比高包，但餐廳經常爆場，打電話訂位又難。
食物質素高 名人讚不停
東華候任主席陳文綺慧都係餐廳嘅常客，原來佢胃口唔細，每次幫襯都食盡前菜、餐湯、兩個意粉加一個薄餅，但平時唔多做運動，睇落依然咁苗條。
東華成員各自鍾情不同美食，副主席何超蕸鍾意同朋友去high tea，食件香濃嘅朱古力曲奇配花茶。另一位副主席施榮恆（Ivan）周日放假會去享家庭樂，獨愛香草醬意粉，食完出草地散步。總理李鋈麟就對cupcake讚不絕口，上層嘅檸檬忌廉食落唔覺膩，蛋糕入面有松子仁，口感十足。總理馬陳家歡愛歎藍莓芝士蛋糕，前主席李三元則愛食薄餅，大讚厚薄適中。
卓妮